A Facultade de Filoloxía e Tradución da Universidade de Vigo acolleu este xoves unha xornada centrada no papel das mulleres galegofalantes nas redes sociais. O evento, enmarcado nas actividades do 8M, foi promovido polas estudantes de Filoloxía Aplicada Galega e Española Sara Castro e Silvia Trabazos co obxectivo de dar visibilidade ao traballo das creadoras de contido en galego.
A convidada principal foi @todomal.va, unha creadora de contidos que compartiu coa audiencia a súa experiencia e os desafíos que afronta no mundo dixital, tanto polo feito de ser muller como por empregar o galego na súa produción.
O encontro, que contou cunha notable asistencia de alumnado e profesorado, xirou arredor da relación entre xénero, lingua e redes sociais. Segundo explicaron as organizadoras, esta proposta buscaba achegarse á realidade da mocidade actual, na que plataformas como TikTok, Instagram e Twitter forman parte da cotiandade.
Durante a conversa, Malva expuxo exemplos concretos de situacións de discriminación, destacando que moitas veces os comentarios en redes, aínda que non semellen misóxinos á primeira vista, parten da crenza de que o traballo dos homes ten máis valor, o que supón unha forma de desvalorización da creación feminina.
A dobre presión: ser muller e galegofalante no mundo dixital
Ademais da cuestión de xénero, a xornada tamén puxo en valor o factor lingüístico no contexto dixital. As organizadoras subliñaron que crear contido en galego implica un reto engadido, dado que a lingua non conta coa mesma presenza nin apoio que o castelán ou o inglés no ámbito dixital.
“Nestes tempos é fundamental revitalizar a lingua galega, e como estudantes de Filoloxía cremos que temos a responsabilidade de xerar contidos que normalicen o seu uso, especialmente entre a mocidade”, explicaron as promotoras do evento.
A mesma idea foi reforzada por Sara Castro e Silvia Trabazos, que falaron da súa propia experiencia como mulleres galegofalantes novas. Segundo recoñeceron, senten un “compromiso por transmitirlle a lingua a outras xeracións e por tentar reverter a situación sociolingüística do galego”, pero admitiron que sofren unha dobre presión, xa que as mulleres que usan o galego en redes receben máis críticas ca os homes da súa idade.
Entre as posibles solucións para reverter esta realidade, apuntaron á importancia da educación e da promoción activa da lingua nas plataformas dixitais. “Sería interesante que desde os centros educativos se tomasen medidas para fomentar o uso do galego nas redes sociais, demostrando que son espazos abertos para todas as linguas e todas as persoas”, expuxeron.
Ademais, as organizadoras sinalaron que os medios de comunicación e os creadores de contido teñen un papel fundamental na difusión da lingua, promovendo formatos máis innovadores e que conecten coa mocidade. “É esencial saír do convencionalismo de sempre e apostar por contidos orixinais que sexan capaces de atraer a atención das novas xeracións”, concluíron.
