Este 17 de novembro, a Praza da Quintana de Santiago de Compostela será o lugar dende o que diferentes colectivos e asociacións, motivados pola convocatoria nacional realizada pola plataforma Queremos Galego, se reunirán nunha “asamblea pola lingua” que mude “o rumbo do galego”, segundo apunta o voceiro desta última, Marcos Maceira. No seu comunicado, apuntan que máis de 150 entidades de toda España asinaron unha declaración unitaria coas medidas urxentes necesarias para reverter a situación de desuso do idioma.
Universidades e outros organismos vinculados a estas amosan xa, por plataformas como ‘X’, o seu apoio á mobilización.
O ILG apoia a mobilización pola lingua de @QueremosGalego. Elisa Fdez. Rei e María Álvarez de la Granja, directora e secretaria do ILG respectivamente, representarán o centro o día 17.
É necesario un novo rumbo que reverta a preocupante situación da lingua galega.#MudardeRumbo pic.twitter.com/rmbJR0dAqg
— Instituto da Lingua Galega (@ILG_USC) November 13, 2024
O evento será iniciado ás 12:00 horas da mañá do domingo, sendo conducido polo profesor, activista, escritor e músico Xurxo Souto. A xornalista Tareixa Navaza introducirá o acto coa lectura da declaración unitaria. Como xa anunciaron as propias artistas a través das súas redes sociais, o encontro concluirá cunha actuación das Tanxugueiras.
Coa sinatura da declaración, que se pode realizar de forma virtual, as diferentes entidades instan á Xunta de Galicia ao inicio dun proceso de normalización lingüística caracterizado pola transparencia, amplitude e que conte coa participación das diferentes entidades sociais galegas. O documento concreta a necesidade dun calendario de aplicación inmediata, con mecanismos de avaliación e recursos para ser realizado de forma íntegra.
Sobre o idioma, o escrito establece: “A lingua galega, a nosa principal obra colectiva, é garantía de dignidade, prosperidade e a mellor ferramenta para avanzarmos conxuntamente como pobo en todos os ámbitos: na cultura, na educación ou no progreso social e económico“.
Pon en manifesto, ademais, o marco legal vixente: “Este proceso debe partir dos obxectivos contemplados nos acordos comúns, amplos e unánimes xa tomados como a Lei de Normalización Lingüística, a Lei de uso do galego como lingua oficial de Galiza polas entidades locais, a Lei Paz Andrade, a Declaración Universal dos Dereitos Lingüísticos, a Carta Europea de Linguas Rexionais e Minorizadas e o Plan Xeral de Normalización da Lingua Galega de 2004“.
