A Asociación C.G. Rosalía de Castro, con sede en Cornellà de Llobregat, abriu unha nova convocatoria do Certame Internacional de Poesía en Lingua Galega Rosalía de Castro, un premio literario creado en 1986 e orientado á promoción da creación poética en galego fóra de Galicia. As persoas interesadas en participar terán de prazo ata o 15 de outubro de 2026 para enviar os seus traballos á entidade organizadora.
O certame repartirá tres premios económicos. A persoa gañadora recibirá 1.150 euros, mentres que o segundo premio estará dotado con 275 euros e o terceiro con 175 euros. Segundo recollen as bases da convocatoria, os textos deberán ser inéditos, estar escritos en lingua galega e ter unha extensión mínima de 30 versos e máxima de 100 versos. Tamén se admitirán conxuntos de poemas cunha temática común, sempre que non superen ese límite total de versos.
Cada autor ou autora poderá presentar un máximo de dúas achegas, xa sexan poemas individuais ou conxuntos de poemas. A organización establece tamén que só poderá ser premiada unha das obras presentadas por unha mesma persoa.
Os traballos poderán enviarse por dúas vías. A primeira delas é mediante correo electrónico ao enderezo certameacgrosaliadecastro@gmail.com. Neste caso, deberá achegarse nun documento adxunto a información da persoa autora: nome, apelidos, DNI, teléfono, correo electrónico, lugar de residencia e procedencia, así como o título do poema.
A segunda opción é o envío por correo ordinario á sede da entidade, situada na rúa Federico Solar, nº 71, 08940 Cornellà de Llobregat, Barcelona. Neste caso, no remite non poderá figurar o nome da persoa autora. No interior deberá incluírse outro sobre pechado co título do poema e cos datos persoais da persoa participante: nome, apelidos, DNI, teléfono, correo electrónico, lugar de residencia e procedencia. As persoas premiadas deberán facilitar posteriormente os seus traballos en soporte informático, en formato Word ou PDF.
A Asociación C.G. Rosalía de Castro será a encargada de nomear o xurado, que estará formado por personalidades relevantes do ámbito da creación e da crítica literaria. O veredicto darase a coñecer durante a cea de convivencia que se celebra ao remate das Xornadas Culturais da entidade, previstas para finais do outono e comezos de decembro.
O Certame Internacional de Poesía en Lingua Galega Rosalía de Castro cumpre nesta edición 40 anos de traxectoria. Fundado en 1986 en Cornellà de Llobregat, o premio naceu cun carácter asociativo e foise consolidando co paso do tempo como unha convocatoria de referencia para a poesía en galego, con participación de autores e autoras de diferentes procedencias.
A iniciativa ten como finalidade promover e difundir a creación poética en lingua galega fóra das fronteiras de Galicia, ao tempo que mantén unha homenaxe permanente á figura de Rosalía de Castro, autora central do Rexurdimento galego.
Co obxectivo de conservar a memoria do certame, a entidade impulsou tamén a edición de volumes recompilatorios. Entre eles figura a colección ‘Certamen de poesía Rosalía de Castro (1997-2018)’, coordinada polo comunicador Xulio Couxil, que complementou publicacións históricas anteriores dedicadas ao palmarés do premio.
