O Campus de Pontevedra acolle este luns, 26 de outubro, unha nova edición de ‘Comunica en galego’, unha iniciativa impulsada polo docente Xosé Baamonde e patrocinada pola Vicerreitoría do Campus de Pontevedra. A xornada busca fomentar o uso da lingua galega na comunicación dixital a través das experiencias de catro creadores de contido que desenvolven os seus proxectos en diferentes ámbitos culturais.
Entre as participantes estará Candela Battiato, graduada en Comunicación Audiovisual e responsable de ‘Sons de Cande’, un proxecto vinculado ao muralismo, á arte urbana e á divulgación cultural que foi finalista do premio á Mellor Creadora do festival Carballo Interplay en 2026.
Tamén intervirá a xornalista Paula Cantelar, integrante de ‘313’, unha iniciativa que comparte con Xoel Rodríguez Poy e Iria Ramos Mesía. O proxecto, recoñecido coa X Bolsa Nacho Mirás, percorre os 313 concellos galegos co propósito de achegar a súa historia e cultura ás novas xeracións.
A música e a literatura tamén terán presenza na xornada. Blanca Navarrete, graduada en Comunicación Audiovisual, compartirá a súa experiencia na difusión da música galega actual a través das redes sociais. Pola súa banda, Raúl Salgueiro, coñecido nas plataformas dixitais como ‘Raulillo de Bolsillo’, presentará o seu proxecto de divulgación literaria en TikTok e Instagram, nacido a partir do seu traballo de fin de máster en Comunicación en Medios Sociais.
