A campaña ‘Toponimízate. Falámosche dos nomes da túa terra’ chegará este venres, 5 de xuño, a Betanzos cunha charla aberta á veciñanza sobre a recolla e conservación da microtoponimia local. A sesión celebrarase ás 19:30 horas no Salón Azul do Edificio do Arquivo e terá como obxectivo explicar como calquera persoa pode colaborar na documentación dos nomes tradicionais das leiras, montes, camiños, fontes e outros espazos do territorio.
O encontro será presentado pola alcaldesa de Betanzos, María Barral, e contará co relatorio de Vicente Feijoo, filólogo da Real Academia Galega e coordinador técnico de Galicia Nomeada, unha iniciativa colaborativa impulsada pola RAG e a Xunta de Galicia para contribuír á conservación dun patrimonio inmaterial ligado á memoria oral e ao coñecemento do territorio.
A charla centrarase especialmente no funcionamento da aplicación Galicia Nomeada, a ferramenta coa que a cidadanía pode incorporar, revisar ou completar información sobre os topónimos e microtopónimos galegos. Desde a súa posta en marcha a finais de 2019, esta plataforma permitiu recuperar máis de 110.000 microtopónimos en toda Galicia.
No caso de Betanzos, a participación cidadá aínda é reducida. Segundo os datos facilitados, Galicia Nomeada recibiu ata o momento só 21 achegas públicas relacionadas co municipio, realizadas por 6 persoas colaboradoras. A campaña procura, por iso, facilitar que máis veciños e veciñas se incorporen a este traballo de recolla dos nomes tradicionais do territorio.
Aínda que Betanzos xa fora obxecto dunha primeira recolleita de microtoponimia a través do Proxecto Toponimia de Galicia, desenvolvido entre os anos 2000 e 2011, aquel traballo non chegou a ser exhaustivo. De feito, algunhas freguesías, como Requián ou Piadela, quedaron con rexistros incompletos, polo que a organización considera necesario continuar coa documentación destes nomes antes de que desaparezan da memoria colectiva.
Durante a sesión, Vicente Feijoo explicará de maneira práctica como utilizar Galicia Nomeada tanto na súa versión para navegadores web como na aplicación para dispositivos móbiles. Entre outras cuestións, abordarase como solicitar unha conta de usuario, como engadir un novo topónimo, como enviar suxestións e como completar a información xa existente na plataforma sobre a toponimia betanceira.
A actividade tamén servirá para dar a coñecer as principais mudanzas que implicou para Betanzos a aprobación da revisión do Nomenclátor de Galicia este mesmo ano. Entre as novidades figura a incorporación dos lugares de Talai, Loureiros e A Veiga, que ata agora non estaban recollidos oficialmente. Ademais da parte práctica, a charla dedicará un espazo á orixe e ao significado dos nomes do propio concello e das súas principais entidades de poboación. Neste apartado abordaranse topónimos de especial antigüidade, como Tiobre ou Illobre, que os expertos consideran de procedencia celta.
