O Concello das Pontes porá en marcha a iniciativa Falarmos… Nós!, un novo grupo de conversa en galego dirixido a todas aquelas persoas interesadas en mellorar a súa fluidez oral, incorporar máis galego á súa vida diaria ou atopar novos espazos de socialización arredor da lingua propia de Galicia. A actividade celebrarase cada mércores, de 20:00 a 21:00 horas, na Biblioteca Enrique Rivera Rouco, nun formato aberto e participativo pensado para facilitar o uso do idioma nun contexto distendido.
A proposta está promovida pola Área de Lingua da Deputación da Coruña a través da súa Rede de Grupos de Conversa en Galego, un programa provincial que procura fortalecer o uso social da lingua, especialmente entre persoas que a coñecen pero non a empregan habitualmente ou entre quen chegou de fóra de Galicia e se atopa en proceso de aprendizaxe.
Desde a organización subliñan que non se trata de clases de galego, senón de espazos creados para conversar con naturalidade, sen presión académica nin avaliación formal. O obxectivo é ofrecer unha contorna segura na que perder o medo a falar, gañar confianza e incorporar progresivamente o galego ás relacións sociais cotiás.
A Rede de Grupos de Conversa en Galego nace precisamente para responder a unha realidade común: persoas que comprenden ou coñecen a lingua, pero que por falta de apoio no seu contexto habitual non a usan con frecuencia. Neste sentido, o programa pretende romper barreiras sociais e psicolóxicas, favorecendo que o galego se converta nun vehículo habitual de comunicación tamén fóra de espazos institucionais ou educativos.
Os grupos están orientados tanto a galegofalantes potenciais como a persoas cun nivel básico de comprensión e expresión oral, sempre que poidan participar activamente nas conversacións. A filosofía da iniciativa pasa por entender a lingua como ferramenta de relación e cohesión social, promovendo encontros nos que o importante é falar e compartir, máis que a corrección normativa.
A rede provincial está aberta á colaboración de administracións locais e entidades sociais, como bibliotecas, servizos de normalización lingüística ou oficinas municipais de información xuvenil, co propósito de estender estes espazos por distintos puntos da provincia e consolidar unha estrutura de apoio ao uso oral do galego.
