Queremos Galego pechou este venres no barrio vigués do Calvario, lugar de nacemento e crianza de Begoña Caamaño, a campaña de difusión da mobilización nacional convocada para este 17 de maio en Santiago de Compostela, unha cita coa que a plataforma busca converter o Día das Letras Galegas nunha demostración pública de apoio social ao idioma e nunha resposta política á situación que define como de “emerxencia lingüística”.
No acto, o voceiro da plataforma, Marcos Maceira, puxo o foco na dimensión cívica e política da escritora e xornalista homenaxeada este ano, reivindicando o seu compromiso social e lingüístico. Maceira salientou o papel de Caamaño “na defensa de todas as causas xustas” e subliñou especialmente o seu activismo a prol da lingua galega, lembrando a súa implicación como profesional da comunicación, como integrante da Mesa pola Normalización Lingüística e como participante en distintas mobilizacións sociais, entre elas as protestas contra o decreto lingüístico no ensino impulsado pola Xunta.
“Begoña Caamaño seguirá camiñando connosco este 17 de maio polas rúas de Compostela”, afirmou o portavoz, vinculando así a figura da autora non só á celebración institucional das Letras Galegas, senón tamén á reivindicación social en defensa do galego.
A mobilización partirá ás 12.00 horas da Alameda de Santiago e contará, segundo a organización, coa participación de ducias de entidades sociais e institucións públicas. O obxectivo é reclamar unha maior presenza da lingua en todos os espazos da vida pública e privada, desde o ensino ata os servizos públicos, pasando pola economía, a cultura, os medios de comunicación e a acción internacional.
Neste contexto, Queremos Galego volveu dirixir as súas críticas á Xunta e ao Partido Popular de Galicia, ao que acusa de manter unha actitude de confrontación co idioma. A plataforma puxo como exemplo recente a eliminación da área municipal de Promoción da Lingua por parte do novo goberno local de Lugo, encabezado por Elena Candia.
Para Maceira, “resulta chamativo e mesmo simbólico que unha das primeiras medidas que toma Elena Candia nada máis chegar ao poder municipal en Lugo sexa eliminar os mecanismos de defensa e protección da nosa lingua”, unha decisión que contrapuxo co discurso institucional do PP durante a semana das Letras Galegas.
A protesta deste domingo servirá tamén para visibilizar o Protocolo Lingua Vital, un documento elaborado por centos de colectivos sociais de diferentes sectores e presentado como unha folla de ruta para frear a perda de falantes e reforzar o uso do galego en múltiples ámbitos. Desde Queremos Galego defenden que este texto concreta medidas para garantir a supervivencia e normalización do idioma, incidindo en sectores considerados estratéxicos para o seu futuro.
A elección do Calvario como escenario de peche da campaña non foi casual. Ademais de ligar simbolicamente a convocatoria coa figura de Begoña Caamaño, a plataforma quixo conectar a memoria da autora coa dimensión reivindicativa dunha xornada que, máis alá da celebración cultural, aspira a converterse nunha nova demostración de forza social en defensa da lingua galega.
