A Xunta de Galicia editará en galego o libro Descubre Lugo, obra do investigador e divulgador José Luis Rodríguez Fernández, segundo confirmou este venres o delegado territorial de Lugo, Javier Arias, durante o acto de presentación celebrado na sede da Delegación Territorial.
Arias cualificou o volume como “un minucioso traballo” e salientou “a acertada estrutura en municipios e comarcas, que a converte nunha guía realmente útil para explorar os atractivos do territorio, tanto os máis coñecidos como os recunchos máis agochados”.
A publicación recolle propostas turísticas que abranguen toda a provincia, ofrecendo itinerarios e rutas adaptadas a diferentes épocas do ano. Neste sentido, o delegado subliñou que o contido do libro “profundiza no propósito da Xunta de descentralizar e desestacionalizar o turismo, poñendo en valor os recursos patrimoniais, culturais e naturais de todo o territorio lucense”.
A futura edición en galego permitirá ampliar o acceso á obra e reforzar o compromiso institucional coa promoción da lingua propia de Galicia nos ámbitos da cultura e o turismo. O delegado destacou que esta iniciativa “favorece a creación de materiais divulgativos en galego, achegando o idioma á experiencia de viaxar e descubrir o país”.
Descubre Lugo ofrece un percorrido completo pola xeografía provincial a través das súas comarcas, recollendo información sobre lugares emblemáticos, patrimonio histórico, tradicións, festas e espazos naturais. A versión galega estará dispoñible proximamente con apoio da Consellería de Cultura, Lingua e Xuventude.