Brad é natural de Indiana (Estados Unidos) e chegou a Galicia hai dous anos. Primeiro viviu en Valdeorras, e actualmente reside en Lugo. Dedícase a ser profesor de inglés e tamén a crear contidos dixitais, un traballo que lle permite manter contacto coa lingua e a cultura galegas.
Explica que o seu primeiro achegamento ao galego foi nun colexio de primaria na Rúa, a través do uso cotián da lingua. Aí comezou a aprender algunhas palabras. Non obstante, recoñece que nunca se sentou a estudar a fondo e que os seus coñecementos son básicos, aínda que mantén o interese. “Contáronme que o galego é máis antigo ca o castelán”, sinala, lembrando unha das ideas que lle transmitiron ao comezo do seu contacto coa lingua.
A percepción da xente diante do seu interese polo galego adoita ser positiva. Brad destaca que case sempre se sorprenden para ben cando ven que un estranxeiro intenta achegarse á lingua. Moitos galegos, engade, dinlle que lles produce ilusión, xa que non é habitual atopar persoas de fóra con esta motivación. Incluso, moitas veces anímano a seguir aprendendo.
No seu día a día, intenta expoñerse á lingua a través de pequenos xestos: ler o xornal en galego, escoitar música en festivais ou bares, ou intentar comprender algunhs libros en galego que atopou no seu antigo piso. Asegura que aínda non se animou co cinema, pero considera que sería unha experiencia interesante.
Preguntado sobre que lle diría a alguén que queira aprender galego, Brad reflexiona que estudar unha nova lingua sempre é positivo. En primeiro lugar, porque permite comunicarse cun grupo novo de persoas. E, en segundo lugar, porque abre a mente a diferentes formas de vida, a novas expresións de humor e a unha apreciación máis profunda das persoas de distintas orixes. No caso do galego, engade, aprender o idioma dá acceso á cultura máis auténtica do país.
