O Concello de Redondela presentou no IES Chapela a programación vinculada á celebración do Día de Rosalía, cunha nova edición do reto “Unha semaniña enteira”, unha iniciativa impulsada polos institutos do municipio que busca promover o uso do galego oral durante as 24 horas do día ao longo dunha semana completa.
A campaña desenvolverase do 20 ao 27 de febreiro e contará coa participación de toda a comunidade educativa local, incluíndo centros de Infantil, Primaria e Secundaria. Ademais, ao longo dos anos o proxecto foi sumando novos apoios e nesta edición implicará tamén a Anpas, clubs deportivos, bibliotecas municipais, a Escola de Música de Chapela, asociacións e o tecido comercial e hostaleiro.
A alcaldesa, Digna Rivas, participou na presentación da iniciativa xunto con representantes dos centros educativos, da Asociación de Empresas, clubs deportivos e da Escola de Música. Durante o acto, Rivas salientou a importancia da colaboración colectiva e agradeceu a implicación das entidades participantes. En particular, destacou o labor da Asociación Lenda de Saúde Mental, encargada da elaboración das chapas conmemorativas, subliñando “a súa implicación dende o inicio e o seu compromiso co idioma”.
Como parte da campaña, o Concello distribuirá 3.500 chapas co obxectivo de visibilizar o reto entre o alumnado e reforzar o compromiso co uso da lingua galega. Ademais, a programación inclúe actividades culturais como teatro, concertos, conferencias e charlas, orientadas á promoción do idioma e á difusión da figura e obra de Rosalía de Castro.
A participación dos clubs deportivos constitúe un dos piares da iniciativa. Segundo explicou o Concello, a implicación destes colectivos permite dar continuidade ao uso do galego máis aló do ámbito escolar, xa que boa parte do alumnado forma parte de equipos locais e desenvolve a súa actividade diaria tamén no ámbito deportivo.
Tamén as Bibliotecas Municipais e a Escola de Música de Chapela se suman ao reto, ampliando o seu alcance a espazos culturais e formativos do municipio.
Impulso ao galego no comercio e na hostalaría
Un dos eixos desta edición é o reforzo da presenza do galego no comercio local, coa colaboración da Asociación de Empresas. Distribuiranse 1.000 bolsas de papel co logo de Rosalía destinadas aos establecementos de Chapela, así como marcapáxinas e unha camelia simbólica.
No ámbito da hostalaría, os locais participantes ofrecerán durante a semana pratos relacionados coa figura de Rosalía, a súa obra ou inspirados na súa literatura. As persoas que acudan a estes establecementos poderán participar nun sorteo do libro “Rosalía e a cociña”.
A alcaldesa agradeceu a colaboración dos distintos sectores implicados e destacou que o obxectivo é “par fomentar entre todos e todas o uso do galego entre a infancia e a mocidade”, incidindo na necesidade de estender a presenza da lingua a todos os ámbitos da vida diaria.
Coa suma de centros educativos, tecido asociativo, deportivo e empresarial, Redondela volve artellar unha programación transversal arredor do Día de Rosalía que busca reforzar o uso social do galego a través da implicación colectiva.