O Equipo de Dinamización da Lingua Galega (EDLG) da Escola Oficial de Idiomas de Ferrol celebrou este martes unha xornada marcada pola alta participación e pola diversidade de actividades destinadas a fomentar o uso do galego entre o alumnado. A iniciativa máis destacada da mañá foi unha nova edición dos “Petiscos de convivencia”, unha proposta que medrou de maneira significativa desde a súa primeira convocatoria.
Se no encontro celebrado en xaneiro participaron arredor de 40 persoas, nesta ocasión foron 65, un incremento que o EDLG cualifica de moi positivo e que terá continuidade con dúas novas edicións ao longo do curso. Segundo avanzou a organización, estas próximas sesións deixarán de ter como eixo central a gastronomía para abordar temas como a educación e a vivenda, entendidos como asuntos comúns que facilitan a conversa e o intercambio de experiencias.
A coordinadora do EDLG, Lucía Penabad Otero, sinala que este tipo de iniciativas permiten cumprir un dobre obxectivo: “a dinamización da lingua para que a xente galega a empregue, se non o fan de cotío, e para que a xente de fóra, porque temos moito alumnado estranxeiro, coñeza a lingua de Galicia e se achegue a ela”. Penabad, profesora de inglés, coordina desde este curso un equipo integrado por dez persoas, entre profesorado e alumnado, e aposta polo uso habitual do galego tamén nas aulas. “Está ben que nos vaiamos afacendo á lingua da contorna, que tamén é a nosa responsabilidade coidala: se non a falamos os que somos de aquí ou os que vivimos aquí, quen a vai falar?”, engade.
Os Petiscos de convivencia combínanse con elementos simbólicos e participativos, como un mapa no que cada persoa marca a súa procedencia, e coa degustación de produtos tradicionais. Nesta última sesión, o alumnado puido probar proia, mentres que na convocatoria anterior o protagonismo fora para a empanada, convertendo a gastronomía nun recurso para favorecer o uso do galego nun contexto informal e compartido.
A programación da xornada completouse pola tarde coa actividade “O noso Entroido”, organizada en colaboración co Equipo de Dinamización da Lingua Galega do IES Concepción Arenal. No marco desta proposta, o investigador Xosé Manuel Seixas ofreceu unha charla sobre esta festa tradicional, acompañada dunha mostra de máscaras de diferentes zonas rurais galegas e portuguesas.
Paralelamente, o EDLG da EOI de Ferrol está a desenvolver o proxecto “Fíos de ida e volta: o galego no mundo”, centrado nas migracións, temática elixida pola escola para este curso. A iniciativa recolle unha serie de entrevistas que darán lugar á publicación dun “podcast multilingüe en galego, inglés, francés, portugués…”, do que xa se gravaron tres episodios. O proxecto parte da idea de Galicia como “ponte entre culturas” e como “terra de inmigrantes e agora tamén terra acolledora”, segundo explica a coordinadora.
Xunto a estas accións, o labor do EDLG complétase con outras propostas continuadas ao longo do curso, como suxestións de lectura, exposicións, faladoiros semanais ou o mantemento do horto da escola, todas elas orientadas a promover o uso do galego en ámbitos diversos da vida educativa.
A boa acollida das actividades reflíctese tamén nas novas convocatorias. Tras o éxito das sesións anteriores, o EDLG anunciou unha nova edición dos Petiscos de convivencia, que terá lugar o martes 3 de febreiro, en quenda de mañá, na cafetería da escola, organizada conxuntamente polo Grupo de Traballo de Atención á Diversidade e o propio equipo de dinamización lingüística.
