Remataron as Xornadas de Microtoponimia que organizou, nos xoves de setembro, o Concello de Carballo, abondando a riqueza dos nomes desde diversas perspectivas. Unha delas, o primeiro día (nas Escolas do Xardín Agra de Caldas, así coñecidas desde esa xornada), foi a presentación da plataforma Galicia Nomeada, a través do seu coordinador, Vicente Feijoo. Grazas ás súas explicación, déronse de alta máis de vinte persoas neste espazo divulgativo e colaborativo, e incorporáronse máis dun cento de microtopónimos do municipio.
Faise a través dunha ferramenta sinxela na que se marchan nomes de leiras, montes e lugares de sempre para que no se perdan. «A importancia da microtoponimia é tal que se pode aproveitar en teses doutorais, expedientes de consellerías e concellos, na loita contra incendios, no uso de ambulancias, nos plans xerais de ordenación, na xeolocalización, na normalización da lingua dentro da aula e moito máis. O seu valor para o futuro do pobo galego é inmenso xa que resulta pracenteiro, propicia o contacto coa natureza, posúe un valor educativo e patrimonial, axuda a coñecer os lugares e a humanidade a apreciar a súa cultura e a reafirmarse como pobo e incluso pode favorecer unha mocidade saudable, indica o Concello de Carballo.
Ademais, a Concellaría de Bibliotecas, Arquivos e Normalización Lingüística presentou o primeiro vídeo da serie chamada Barrios de Carballo. Esta primeira entrega destes traballos audiovisuais dedicouse ao barrio da Goubea, e participaron Fernando Cabeza, José Borrazás, Chita Esmorís, Manuel Andrade e José Pérez. O Concello xa está traballando nos seguintes capítulos.