Na aldea de Arroxo, en Lourenzá, vén de botar a andar un proxecto singular que mestura aprendizaxe lingüística, integración social e intercambio cultural: a Escola de Neofalantes. Trátase dun espazo educativo dirixido a persoas adultas de diferentes nacionalidades que decidiron aprender galego, algúns por motivos profesionais e outros simplemente por vontade de integrarse na comunidade na que viven.
“Hai xente que o fai para poder acceder a traballos na administración pública e outra xente como eu que, simplemente por integración, nos decidimos”, explica Carlos Garcés, un dos impulsores desta iniciativa que leva xa tres meses en funcionamento.
Clases, debates e excursións para vivir o galego
As sesións presenciais teñen lugar os sábados pola tarde, de 17:00 a 19:00 horas, pero a actividade non remata aí. Tamén contan con encontros en liña os mércores, onde o grupo participa en debates sobre temas diversos. Ademais, os fins de semana realizan saídas culturais para coñecer mellor o territorio e a cultura galega.
Entre as visitas realizadas destacan lugares como a Finca Galea en Alfoz, o Museo Provincial do Mar en San Cibrao (Cervo) ou o Centro Cultural de Barreiros. Este sábado, precisamente, celebran unha sesión aberta ao público no Museo do Mar, onde darán a coñecer o proxecto, compartirán os seus traballos de campo e visitarán a exposición Palabra e Memoria, centrada en epitafios fotográficos.
Un grupo tan diverso como unido polo galego
A escola, que conta actualmente con 14 alumnos, converteuse nun espazo multicultural no que conviven persoas de orixe belga, brasileira, arxentina, española e doutros países. A pesar da diversidade, hai un nexo común: o interese pola lingua galega e pola cultura local.
Segundo explica Garcés, a experiencia está a resultar moi positiva, xa que “todos falan e escriben xa en galego” e senten que esta aprendizaxe “fainos sentir máis incorporados á vida diaria da zona”.
A Escola de Neofalantes é unha iniciativa promovida por persoas ligadas ao ensino e á cultura da Mariña, con ampla traxectoria en proxectos de dinamización lingüística. Entre eles atópanse o escritor Lionel Rexes e o profesor Bernardo Penabade, quen xa puxo en marcha no seu día o Proxecto Neo no IES Perdouro de Burela, unha experiencia que incluía unha radio escolar para adestrar o uso do galego entre o alumnado.
Este novo proxecto nace cunha vocación clara de promover o uso da lingua galega entre a poboación adulta e neofalante, ofrecendo unha experiencia educativa divertida, práctica e integradora, que vai máis alá da aprendizaxe da lingua para tocar tamén aspectos históricos, literarios e culturais de Galicia.
Na Escola de Neofalantes, a lingua é só o punto de partida. As conversas derivan en temas tan variados como o cemiterio alegre de Săpânța en Romanía, o sistema educativo brasileiro ou a tradición musical arxentina. Como din os seus promotores, “non se trata só de falar galego, senón de compartir culturas”.
