O concelleiro de Cultura e Normalización Lingüística de Pontevedra, Demetrio Gómez, e o promotor Marcos Rivas presentaron esta mañá unha nova edición do Galegote, o festival de música en galego que se celebrará os días 24 e 25 de abril de 2026. A iniciativa recupera a súa actividade tras un parón e propón unha programación distribuída por distintos espazos da cidade, con especial protagonismo para a segunda xornada, definida como a máis festiva.
Durante a presentación, Gómez destacou a relevancia do evento dentro da programación cultural pontevedresa, cualificándoo como un dos “buques insignia”. Segundo indicou, o regreso do festival prodúcese nun “momento moi doce da música galega”, no que a proposta busca conectar artistas locais con outros procedentes de fóra da cidade. “Demostra que somos unha cultura viva e que temos unha escena moi potente”, afirmou.
Pola súa banda, Marcos Rivas, vinculado á produtora Jack Jack, puxo o foco na función do Galegote como plataforma de lanzamento para novas propostas musicais. Segundo explicou, o festival permite que bandas emerxentes teñan un primeiro contacto co público antes de dar o salto a citas de maior formato. Rivas sinalou tamén o contexto actual da música feita en Galicia, cunha nova xeración de artistas que están a ocupar espazos en salas dentro e fóra da comunidade en estilos diversos.
O cartel de 2026 reflicte esta variedade estilística. Entre os nomes confirmados figuran propostas de música urbana como Kid Mount e Montedapena, así como bandas de indie, rock e pop como Michu da Rocha, Portosanto, Chicharrón, Dogo, Law ou Flip Corale. A programación inclúe tamén formatos diferentes, como o concerto acústico de Eladio y los Seres Queridos, o blues e jazz de Allada ou a proposta da Duendeneta Dilleis, que fará un percorrido pola música galega desde os anos 50 ata a actualidade.
Os concertos desenvolveranse en formato de ruta, repartidos por locais hostaleiros e espazos da cidade, co obxectivo de favorecer a proximidade co público. Entre os escenarios previstos atópanse A Gramola, O Diáño, La Verbena, A Pomada, O Chato, A Nasa e o Campiño de Santa María. A organización avanzou que os horarios detallados se darán a coñecer nos vindeiros días, unha vez pechados os últimos axustes de produción.
Ademais, o festival estreará nesta edición unha nova identidade visual deseñada polo equipo pontevedrés Culebra Estudio. A proposta renova a imaxe do evento mantendo elementos recoñecibles de edicións anteriores, como a presenza da lingua como símbolo gráfico.
