O Concello do Barco de Valdeorras porá en marcha durante as vacacións de Semana Santa unha experiencia piloto de inmersión lingüística en galego dirixida á infancia. A iniciativa, presentada pola concelleira de Cultura, Margarida Pizcueta, desenvolverase ao longo de tres días baixo o lema ‘Galego modo on’, coa intención de fomentar o uso da lingua propia nun contexto no que os datos apuntan a un descenso progresivo entre a poboación máis nova.
O proxecto, titulado ‘Coñecer a maxia de Galicia’, está orientado a nenos e nenas de entre 5 e 12 anos, que participarán nun campamento de mañá na biblioteca municipal. Durante tres xornadas, de luns a mércores, as persoas participantes poderán realizar actividades de carácter lúdico vinculadas ao territorio, á cultura e ás tradicións galegas, nun espazo pensado para favorecer o contacto co idioma.
Segundo explicou Pizcueta, a iniciativa responde á necesidade de achegar o galego ás novas xeracións, especialmente nunha franxa de idade na que o uso da lingua experimenta un retroceso. “O galego vai ser unha lingua morta se non se fai nada”, advertiu, ao tempo que instou á Xunta a revisar as políticas lingüísticas actuais: “Cando aplicas unha serie de políticas e non están indo ben…”.
A concelleira sinalou que, aínda que poida resultar sorprendente promover un campamento de galego en Galicia, a realidade sociolingüística mudou nas últimas décadas. “Aínda que pareza raro, porque en Galicia o lóxico é que un neno poida crecer e escoitar mestres e familiares falando en galego, é dificilísimo”, indicou. Neste sentido, apuntou a unha crecente castelanización do contexto familiar, que dificulta a transmisión interxeracional da lingua.
O campamento contará cun máximo de vinte prazas e desenvolverase en horario de 9:00 a 14:00 horas. O custo da actividade será de 30 euros por participante, cantidade que será igualada pola achega municipal. O prazo de inscrición permanecerá aberto ata o venres no propio consistorio.
Pizcueta expresou o desexo de que esta proposta teña continuidade no tempo e que poida ser replicada por outros concellos galegos. “Confiamos en que este gran de area, xunto a moitos outros, sirva para facer montaña e reverter a situación”, afirmou, ao tempo que fixo referencia ao chamamento da Real Academia Galega a “virar o rumbo” ante o estado actual da lingua.
Durante a presentación, a edil tamén compartiu unha experiencia persoal que marcou a súa relación co galego. Relatou como, sendo estudante nun contexto castelanfalante, tomou conciencia da importancia das linguas minoritarias ao escoitar nunha clase a gravación do último falante de dálmata. “El morreu e con el morreu a lingua”, lembrou sobre a explicación do seu profesor, unha reflexión que cualificou como determinante: “Por min que non quede”.
