O Consello da Xunta aprobou a convocatoria de 11 novas bolsas de formación no Centro Ramón Piñeiro para a investigación en Humanidades, concretamente en traballos relacionados coa lingua galega. Tal e como detallou o Goberno galego nunha nota de prensa, destinaranse 293.174 euros para “fomentar a capacitación dos titulados universitarios, ao mesmo tempo que se promove o ensino, a cultura e a investigación en lingua galega”.
Neste sentido, as bolsas permitirán que os investigadores profunden nos seguintes proxectos de investigación: ‘Tesouro paleográfico’, ‘Corpus de referencia do galego actual (Corga)’, ‘Corpus Documentale Latinum Galleciae (Codolga)’, ‘Bibliografía informatizada da lingua galega (Bilega)’, ‘Terminoloxía científico-técnica’ e ‘Informes de literatura’. Tamén ‘Recuperación de textos literarios e xornalísticos galegos‘, ‘Lírica medieval galego-portuguesa’, ‘BiRMED: Bibliografía de Referencia do Arquivo Galicia Medieval’ e ‘Dimensións da identidade colectiva de Galicia’ e ‘Estudo e edición de textos literarios galegos‘.
Como novidade, nesta nova convocatoria o número de prazas será de 11, unha máis que en 2024. Así, poderán solicitar a súa as persoas licenciadas ou graduadas universitarias das titulacións esixidas no proxecto para o que se presenten. Ademais, deberán acreditar o seu coñecemento de lingua galega no nivel de perfeccionamento ou Celga 4, non resultar beneficiarias dunha bolsa en concursos anteriores ou de contratos do Centro Ramón Piñeiro e posuír unha nota media no seu expediente académico igual ou superior a 6,5 puntos.
ESTUDO DA CULTURA GALEGA EN UNIVERSIDADES
Por outra banda, a Xunta acordou destinar máis de 170.000 euros para continuar fortalecendo a proxección exterior da cultura e a lingua galega a través do seu estudo nas universidades de Leipzig (Alemaña), Varsovia (Polonia) e Barcelona. A través destes convenios, de catro anos de duración, as institucións académicas integrarán os ensinos da lingua, literatura e cultura galegas nos seus plans de estudo.
En concreto, no caso da colaboración coa Universidade de Leipzig, iniciada en 2010, a Xunta destinará un total de 97.225 euros para o próximos catro anos. Con respecto á de Varsovia, serán preto de 64.000 para o mesmo período de tempo. Para o convenio coa Universidade Autónoma de Barcelona destinaranse 12.000 euros para o período comprendido entre 2025 e 2028, ambos os incluídos.