Coincidindo coa celebración do Día Mundial da Poesía, Afundación, a Obra Social de Abanca, xunto coa Consellería de Cultura, Lingua e Xuventude e o Centro PEN de Galicia, anunciaron a convocatoria da vixésimo cuarta edición do Premio de Poesía, unha iniciativa orientada a promover o uso do galego na creación poética.
O certame está aberto á participación de persoas que presenten obras inéditas, que non fosen premiadas nin concorran a outros concursos, cunha extensión mínima de 600 versos. O prazo de presentación permanecerá aberto ata o 31 de xullo de 2026.
O galardón conta cunha dotación económica única de 7.000 euros, ademais da publicación da obra gañadora na colección ‘Arte de Trobar’, editada polo Centro PEN de Galicia e Afundación. O xurado estará composto por cinco persoas de recoñecido prestixio no ámbito literario, e o seu veredicto darase a coñecer no outono de 2026.
Este premio, creado no ano 2002, naceu coa finalidade de reforzar a produción poética en lingua galega e contribuír ao desenvolvemento da creación cultural contemporánea.
Ao longo das súas edicións, o certame foi distinguindo a autores e autoras relevantes da literatura galega, como Xavier Seoane, María do Cebreiro, Yolanda Castaño, Emma Pedreira, Gonzalo Hermo ou Ledicia Costas, entre outras voces. Na pasada convocatoria, o premio recaeu en Xosé Miranda.
A continuidade do certame conta co apoio da Dirección Xeral de Cultura, dependente da Consellería, que colabora de forma sostida nesta iniciativa, considerada unha referencia na axenda cultural galega e un instrumento de estímulo para a creación literaria en galego.
