A Asociación de Escritoras e Escritores en Lingua Galega (AELG) dará un novo paso na súa relación co ámbito literario palestino coa sinatura dun convenio de colaboración coa Unión Xeral de Escritoras e Escritores Palestinos, un acordo que se formalizará coincidindo coa entrega do recoñecemento ao Escritor Galego Universal 2026.
O acto terá lugar no marco da gala dos Premios Follas Novas do Libro Galego, prevista para o 9 de maio en Santiago de Compostela, e contará coa homenaxe ao escritor palestino Basim Mohammad Saleh Adeeb Al-Khandaqji, distinguido nesta edición co citado galardón.
O acordo entre ambas entidades busca reforzar os lazos culturais e literarios entre Galiza e Palestina, facendo fincapé na promoción das creacións en lingua propia. Entre os obxectivos previstos figura o intercambio entre autoras e autores, así como a difusión mutua das súas obras, nun contexto de cooperación internacional no ámbito literario.
A iniciativa insírese nunha liña de traballo que pon o foco na visibilización de sistemas culturais minorizados e na creación de redes entre comunidades que comparten procesos de defensa e promoción da súa lingua.
A colaboración entre o ámbito literario galego e palestino non é nova. En 2024, esta relación xa se materializara nun proxecto editorial impulsado por Nós Diario en colaboración coa AELG, que deu lugar á publicación dun caderno especial de 32 páxinas con poemas de autoría colectiva.
Aquel volume reuniu textos de 23 escritoras e escritores palestinos, incluíndo tanto voces de referencia como autoras e autores no exilio ou afectados pola violencia exercida por Israel, configurando unha mostra representativa da diversidade e da situación da creación literaria palestina contemporánea.