A investigadora Iria de Dios Flores (Vigo, 1990) desenvolve a súa carreira científica no ámbito da lingüística computacional e a intelixencia artificial, un campo no que analiza como funcionan os modelos lingüísticos artificiais e como poden contribuír ao estudo da linguaxe humana. O seu traballo tamén aborda un reto central das tecnoloxías actuais: a presenza das linguas con menos recursos, como o galego, nos sistemas de intelixencia artificial.
De Dios formouse en Linguas Estranxeiras e Lingüística na Universidade de Vigo e doutorouse posteriormente na Universidade de Santiago de Compostela, cunha tese centrada na psicolingüística, disciplina que analiza os procesos cognitivos implicados no procesamento da linguaxe. A súa investigación foi recoñecida co premio á mellor tese do ano 2021 da Sociedade Española de Lingüística.
Durante a etapa final do seu doutoramento comezaron a popularizarse as redes neuronais artificiais, tecnoloxía que serve de base á maior parte dos sistemas actuais de intelixencia artificial. A partir dese momento orientou parte do seu traballo cara ao estudo destas ferramentas desde a perspectiva da lingüística. Segundo explica, o seu interese céntrase en comprender os procesos “cognitivos” das máquinas e comparalos cos mecanismos que empregan as persoas para aprender e procesar a lingua.
Máis información en La Voz de Galicia
